आव्हानांच्या गगनामध्ये

आव्हानांच्या गगनामध्ये 
मुक्त आम्ही फिरणार 
कर्तृत्वाचे पंख आमुचे 
कधीच ना थकणार ।। ध्रु. ।।

अभ्यासाशी दोस्ती करूनी 
हिरव्या डोंगरवाटा फिरूनी 
चुस्त तनाने मस्त मनाने 
गीत नवे रचणार ।। १ ।।

प्रतिभाशाली प्रज्ञा अमुची 
ज्योत अंतरी विश्वासाची 
शास्त्र कलांची करून साधना 
वीरव्रती बनणार ।। २ ।।

असोत रस्ते बिकट, वाकडे 
परंपरांची अंध झापडे 
जन्मजात भेदांच्या सीमा 
उल्लंघून जाणार ।। ३ ।।

एकाकी ही वाट नसावी 
सन्मित्रांची साथ असावी 
स्वप्न उद्याचे सत्य बनविण्या 
शर्थ आम्ही करणार ।। ४ ।।